السبت، نوفمبر 01، 2008

إعلام




*نظرا للكم الهائل من الترشحات الخاصّة بمراسلي القلقال نعلم كافة القرّاء أنه سيتم غلق باب الترشح في موفّى شهر نوفمبر2008

* ننتظر اقتراحاتكم تعاليقكم ملاحظاتكم أو مقالاتكم حول المواضيع التّاليّة:
- في ما يخص المشروع المتعلّق بصيانة المدينة العتيقة
- في ما يخص خربة الشباب و الثقافة بالشاطئ
- في جائزة الحمّاص المثالي
- في جمعية كرة اليد: بين الالتزام و البحث عن الهويّة قراءة في تاريخ جمعيـّة

- في فكرة عن موضوع مشروع و ْبهامة
- في فكرة عن موضوع مرجانة و لبيب في منزل تميم




متفرقات

*في الأفق الأزرق سعر البيرّة يواكب الأزمة الاقتصادية كانت بـ 2000 ولاّت بـ2500 ثم نزلت إلى 1950 فرنك

* السبت 1 نوفمبر 2008 يتزوج حكيم الشعباني رئيس بلديّة مزْتميم من فتاة صقلبيّة (لمزيد المعلومات انظر مقال الخطوبة) بحضور السيّد والي نابل و ثلّة من أعيان المدينة من مثقفين و رجال أعمال/ الاحتياطات الأمنية كانت كبيرة ياسر خاصة على مستوى النقطة القارّة في مخرجْ المدينة/ أحيا الحفل الفنّان القدير على مناسبات الدّخْلة بلغيث الصيادي و رائد الأغنية البذيئة المنصف عبلة إلّي ظهرت عليه بوضوح أعراض شبيهة بمستهلكي رحيق الكيروزين/ المؤثرات الصوتية تاعبة ياسر/ في ما يخص التحضيرات الخاصّة بالاحتفال: جرّار البلديّة كرْكرْ الصابرين حتى بيّل و الفرقة الحسينيّة التابعة للبلديّة قامت بمجهود غير عادي (القلقال : نورمـــالْ طبّالْ وْ عرّس لـْولدو)

معينْ

معينْ هو أحد ألطف المتساكنين في مدينة منزل تميم, (كي تشوفو تعطيه 12 عام) قصير القامة, ملامحه وتصرّفاته جـدّ طفوليّة, سرواله ضيّق إلى درجة يفيض بها نصفه الأعلى, هو أيضا من هوّاة تقبيل المارّة,المائة مليم وتلصيق الطوابع البريدية
إلى كلّ غريب عن المدينة : إن صادفت معينْ يوما فلا تحاول أن تعطيه أكثر من "ميا" إذْ أن هذا الأمر يمكن أن يعرضّك لمسرحية إشارات يدويّة استفزازيّة من تأليفه و إخراجه نصّ هذه المسرحيّة يقتصر على صياغات مختلفة لهذه الحروف (ع..ب..ز..ص..) و أداؤها ارتجال حركي يعتمد بالأساس على معصم و أصابع اليد.

منزل تميم فـي 06/10/2008

ليلة الاثنين الموافقة لـ 06/10/2008
منزل تميم تحتفل بعيد الشجرة

عصابة الزلاّط الأحمر بالشمردل تقوم بعمليّة تمشيط واسعة النطاق لتستقرّ في حومة الكوشة بين قهوة التوتات و سيدي الفيلالي. عناصر هذه العصابة من أصول غجريّة نزحت من مناطق داخليّة إلى السّاحل التّونسي واختصت في جني البنادورة (الطماطم) خلال موسم الصيف (باشْ ما نظلموش الناس بالفارغ) أغلبيّة الهطـّاية استقرّوا قرب أرياف المدن الصغرى لممارسة مهن بعضها شريفة و في الغالب, و الحق يقال, أقللللللللــــّـل شرفا... ففي منطقة الرأس الطيب ترتزق مجموعات الهطاية من الرّؤوس الطيبة إذْ أنّ هذه المجموعات الرّحلْ تنازلت عن أنشطتها الموسميّة و استقرّت في الأحْواز الإستراتجية للمدينة... فأصبحت عمليّات النـّهب (والسرقة والعنف بجميع أشكاله مرورا بالاغتصاب) روتينا مقرفا مخيفا و بدون حلّ / هذه الحكاية و كما ذكرنا ليست حكرا على منطقة معينة في تونس بل هي معروفة في العالم أجمع / يرى بعض محلّلي الأحياء أن المحرّك الأساسي لنشاط هذه العصابات هو الحقد النّاتج على الفروق الاجتماعية ألخ.
التحضيرات لمراسم استقبال عيد الشجرة المبارك بدأت كالعادة منذ منتصف نهار الاثنين فبعد معاينة أماكن غراسة الأشجار من طرف مسؤول رفيع المستوى و مكلّف باتصالات العصابة تمّت عمليّة تحويض الأماكن و تحضير المدعوين نفسيـّا لاستقبال عيد الشجرة في أحضان الحومة. وكالعادة قامت عناصر العصابة باحتساء ما لـذّ و تعفّن من :
- عصير المولوطوف و هو عبارة عن تركيبة خاصّة جدّا مكوناتها خمرو_بتروليّة
- رحيق الكيروزين و هي تركيبة متوسّطة المدى يتمّ استهلاكها عن طريق الفم ومتكونة من 3/1 مازوط و 3/1 كحول (من المحبّّذ 90% ( و 3/1 سكّر يخلّط الكل مع فشفشة كميّة من الغاز الطبيعي بنسبة دبّوزة غاز لكل 12.5 ل (ووْ روسكم يا رجال بعيني ريتهم يخدمو و يشربو في هالرّحيق)




تحذيرات خاصّة
* يستحسن عدم التدخين عند استهلاك هذا العصير إذ أنّه زيادة على إمكانيّة الانفجار المعوي فإن الدماغ البشري لا يستطيع تحمّل أي جزيْء آخر.
* يستحسن استهلاك كلب مشوي بالغ قبل تناول الرحيق


الأهم في كل هذه الجزئيّات هو مفعولها الواضح على تنشيط و إحياء الجانب الاحتفالي لعيد الشجرة المبارك الذي انتهى بغراسة أربع أنواع من العود الرّقيق في راس ولد لـهْتـكْ وكذلك في رأس محمد علي بن ر. على مرأى و مسمع الجميع/
رئيس عصابة الزلاّط الأحمر صرّح بأن اختيّار هذه الرّؤوس الطيّبة أساسه محاولتهم السيطرة و الحدّ من و على تحرّكاتنا اللّيليّة/
الغريب في الأمر يا جماعة أن العديد من عناصر هذه العصابة بدأت تظهر عليهم علامات الثّراء: كميونات, موطورات, بْراوطْ و برادعْ جددْ, أحمرة نظيفة و سمينة.....


منزل تميم فـي 02/08/2008

القبض على أولاد فسّــو بتهمة بيع الخمور و الجعـة خلسـة

في الحقيقة القضية معقدة إلى درجــة يصعب تصديقها / فرقة الشرطة العدليّــة بمدينة منزل تميم قامت بإلقاء القبض على كتكوت و بنـّـانة بعد مراقبة طويلة دامت أيــام عديدة قبل بداية الشهر المعظـّـم في مرحلة أولى وتواصلت بعد ليلة عيد الفطر الممطرة في مرحلة ثانية…
كان رئيس الفرقة ومجموعة من الأعوان على سطح نزل تميم يراقبون الحركة المريبة للمواطنين أمام منزل عائلة فسّـو(ما نطوّلشي عليكم) في اليوم المذكور أعلاه تمّت عمليّة المحاصرة و الإنزال بنجاح لكن الغريب في الأمر أنّ العون المكلّف بالتفتيش الميداني و بعد معاينة المنزل المحاذي للمرْشي فوجئ بعدم وجود دليل مادّي واضح يدين الإخوة إذْ أنّه لم يعثر إلا على بعض علب الجعة الممتازة (جدّا) و قارورتين من الخمر الوردي (كوديا تفـّـاح)/دخل بقيّة الأعوان للتأكد ثم خرجوا من المنزل و علامات البهـتة تعلو وجوههم
- " شاف… شاف ما فمّا كان زوز شرابْ و حارة بيرّة قزازْ…"
- " شـنْهووو ؟"
يعني ذلك أنه لا وجود لجريمة بما أنّ هذه الكمّــيّـات يمكن اعتبارها ضمن قائمة الاستهلاك الشخصي/ علامات الفزع كانت باديّة بشكل واضح على السيّد رئيس الفرقة هذا الأخير نزل بسرعة فائقة من السيّارة و دخل إلى دار فسّو بغرض التفتيش الدّقيق و بالفعل (الدقّة مطلوبة في مثل هذه المواقف) لاحظ الملازم م.ص. مرحاضا ثانويّا صغيرا و مظلما (انظر الصورة) فبادر بالدخول دون خوف و لا تردّد و رغم قوّة الرّائحة تمكّن من ملاحظة زرْ أحمر مخـْفي وراء ميزاب المرحاض وسلك كهربائي متّصل بزرّ آخر/ "نْزلْ على هاك الفلـْسة" وإذ بأرضية المرحاض تهتز و ترتعش تحت قدميه ثمّ نزلت به ببطئ إلى سرداب عميق شبيه بمغارة علي بابا ( أنظر الصور لا تكذب ... مغارة فسّـو بابا) بيرّة, شراب, وسكي من جميع الأنواع, ذهب, ألماس, ياقوت...
المهم تمت المعاينة و القبض على التنظيم السرّي للإخوة فسّو و نقلت السلعة الموجودة في الدهليز إلى مركز المنطقة/ و يقال أن المواطن الشهير بغّة السّوسي صاحب الحانة التّابعة لنزل تميم هو الذي اشتكى ولاد فسّو بعد تضرره ماديـّا من نشاطهم الإقتصادي خاصّة ليلة العيد قالّك " كيفاش كيفاش البارْ متاعي ينش في الزبـّان (بغـّة يتكلّم بالزَّ) وولاد فسّو يخدمو للصباح"





الجمعة، أغسطس 15، 2008

ألـــو إرهاب

منزل تميم في 16/08/2008

كي العادة و العوايد حجــّارية في مطعم الأفق الأزرق...
روّاد هذا المكان الجميل من أساتذة, دكاترة,طلبة, مثقفين و مسؤولين و خدّامة يطالبو بحماية هذا الفضاء الأنيق من براثن الإرهاب المنظــّم و الخطير. أسرة القلقال مع مجموعة من الإخوة الغيورين على الأماكن الجميلة في خط قربة الهوارية أثارو هالمشكل على موقع إلكتروني معروف ليلة السبت الفارطة و اتفقت المجموعة ( تقريب 246 واحد تميمية, غزّية, قرابة, قليبيّة و صقلبيّة فمــّا زادة شكون من الدّاموس من منزل حر من القبــّة من الشعباني من واد الخطف من كركوان من غابة شيشو من سيدي حسّون من الكرمانـيــّة من لبنة من الميدة و من بو كريم ) على فتح خط هاتفي أخضر للإستماع إلى تشكيــّات المنطقة من أعراض و ظواهر الإرهاب المنظم و العشوائي..
ألـــو إرهاب...

الخميس، أغسطس 07، 2008

إلــّي يعومْ يزبـــّـلْ

فمّا كلمة حق لازم تتقال في حق المجهود إلّي قاعدة تقوم بيه بلدية منزل تميم كل صباح في تنظيف.... الرمل متاع البحر.... شي يعمل الكيف حتى للــ 8 متاع الصباح من بعد الناس إلّي تعوم تزبــّل في تزبيــل يحشــّـمْ ...........

الاثنين، أغسطس 04، 2008

الله أكبر الله أكبر خبر عاجل


منزل تميم في 03/08/2008

منزل تميم تفقد واحد من أشهر أعلامها لطفي ولـْد السيّد (الديمارير) كنا أشرنا في مقال سابق إلى طرافة و طيبة هذه الشخصية المحورية و لاحظنا كذلك أن الديمارير قاعد يشرب برشا نظرا لمروره بأزمات نفسيّة و اجتماعية خاصّة جدّا ... خسارة خسارة كبيرة للبلاد . أسرة القلقال تعلن الحداد و تعلــّق نشاطها مؤقتا إلى حين التحقق من أسباب هذا الموت المفاجئ. مع العلم أن الديمارير توفــّاه الأجل في سهريـّة فاها شبعة كسكسي و شبعة وسـْكي.... آش كون صبْـلو بها الطريقة الوحشيّـة ؟ آش كون قتـل الديمارير؟ أي خبرْ يخصّ هذه القضيّة يهمـّنا...

خبر عاجل


منزل تميم في 003/08/2008

حكيم الشعباني رئيس بلدية منزل تميم يحتفل بخطوبته على بنت التـْهامي (26 عام) تميميـّة تعيش في تونس (03/08/2008) حمد الله عليك يا حكيم

خبر عاجل


منزل تميم في 02/08/2008

مطعم الأفق الأزرق بسيدي جمال الدين حجّارية تكسّر الكؤوس و تهرّب جميع روّاد هذا المكان الجميل, فمّا شكون يقول بعض الجيران تقلّقو مالحس (رغم أن المكان هادئ جدّا) وفما شكون يقول بعض الحاسدين تقلقو مالخدمة متاع حمّادي و لكن فريق القلقال يقول و يتحمّل مسؤوليّة كلامو هذه أوّل علامات الإرهاب المنظم في منطقة الدّخلة.

خبر عاجل

منزل تميم في 02/08/2008

أعمال شغب على مستوى تقاطع الكيــّاس الجديد وكيّاس العمود, شقوفات و حجر و دمْ للركبة خسارة والله خسارة

خبر عاجل


منزل تميم في 02/08/2008
الحرّيق يكتسح شواطئ منزل تميم مأساة إيكولوجية سببها :
- فضلات المنطقة الصناعيّة التّابعة لمنزل حرْ
- مزارع البلاستيك على مستوى خط قربة /قليبية
- مخْ المواطن المخماخْ
الكل يعرف أنّ الهايشة الوحيدة إلــّي تاكل الحرّيق هي الفكرون المائي هذا الأخير قاعد ينقرض على خاطرو يغلط في الساشيّات ياكلهم يموت يا حصرة على نادي العلوم متاع حميدة بو لبيار كانت مجموعة كاملة متخصصة في إيجاد حلول لهذه المشاكل البيئية !!

خبر عاجل



منزل تميم في 03/08/2008

موسم النزوح إلى الشاطئ هو شعار منزل تميم هذه الأياّم : كل ليلة تاكل بعضها أفواجا أفواجا زرافات و وحدانا تتواصل كل ليلة عمليات الإنزال في شاطئ منزل تميم, عصابات على الدرّاجات النّارية وْ كعّابي تنزح كل ليلة من المدينة و أحوازها البعيدة و القريبة إلى الكرنيش الوهمي متاع البحر... ما تسلم حتّى أنثى من بلادة و كلام هذه العصابات, و المصيبة أنّو ما فمّاش حتى حل...

خبر عاجل


حمّــام الغزاز في 02/08/2008
خسارة يا ثقافة خسارة

في حمام الغزاز " يسار مزيــّف و قلــّة أدب حقيقيــّة "
مهرجان الفلم القصير في هذه الدورة إلــّي كالعادة ينظمها و يرأسها م. المؤدّب اختتمت فعاليّاته نهار السبت و كان شعار المجموعة " يسار مزيــّف و قلــّة أدب حقيقيــّة " العائلات التي لمْ تستطع مواكبة فعاليات هذا النشاط الثقافي تتشكــّى من الكلام البذيء و من تبادل العنف اللفظي و الجسدي على مرأى و مسمع المسؤولين... يقول واحد من المواطنين أن الكلمة الوحيدة المعبرة على هذه الدورة هي : صفر. بلغة مهذبة شويّا شفنا في حمام الغزاز بيرّة, شراب أحمر, بنات موش باهين (يقولو في كلام لقباحة) و ولاد موش باهين بالعينو قــدْ قــــــــدْ كذلك رجال عندهم برشا خـنوثة (حاجة بين التخونيث و الأنوثة)...زعمة زعمة ماليسار و معارضين... وْ هوما ما يفرْقوش بين الالتزام بالثورة و الهمجية متاع قلــّـة التربية, فرق بعيد بين المهمــّش و الهمجي. خسارة يا ثقافة خسارة.
مع العلم أنْ السكــّان الأصليين لمدينة حمّام الغزاز معروفين بجدّيتهم ومعروفين في منطقة الرأس الطيّب أنهم أهل علم و اعتدال في ما يخص أمور الدنيا و الدّين...
فينكم يا غــزّية ؟

خبر عاجل


منزل تميم في 01/08/2008
السكنبر بسبعة لاف في بلاد السكنبر يا والله حوال


منزل تميم في 20/07/2008


شليلة وْ مليلة

خبر مؤسف بالرّسمي موش تفدليك
منصف حمامة يقاطع المدينة بالإضراب على ممارسة الطيران الشاطئي(ط.ش) بالنـّسبة لموسم 2008-2010
بعض المواطنين إلــّي تعودوا على نشاط و تنشيط هذا الكائن الوديع و المتخصص في ممارسة هذه الهواية الغريبة على الشريط الساحلي لمدينة الدخلة يقولو أنّ سبب هذا العزوف راجع بالأساس إلى التأثير السلبي للتنصيبة
L’installation
إلــّي نــْـدفها حكيم الشعباني أمام مقهى منديلا... أيْ نعم نــْـدفها... ما تتفجعوش
...
الهادي حلوْتو مدرب سابق لهذه الريّاضة حاليّا يشغل خطة محلل فنــّي متخصص في الط.ش و قهواجي (مترسم) يشير بكل ذكاء إلى أن هذه التنصيبة لا أخلاقية وْ قاعدة تتسبب في مشاكل نفسية كبيرة للمواطنين بحيث أنّ أي تميمي يهبط شايخ إلى محور المدينة اطيرلو بمجرد مشاهدة الحمام متاع ولد الشعباني. و يضيف الهادي أن المنصف يمرّ بأزمة نفسية حادة شبيهة بأزمة التي تسبب فيها أستاذه متاع الفلسفة عادل ح. عام 1984
و يضيف الهادي بما أنّ المنصف حمامة شاعر و مرهف الإحساس تكوّنت في دواخله عقدة ابستيمولوجيّة من هذا العمل.
...
في موضوع هذه التنصيبة دار بين فريق القلقال و مسؤول رفيع المستوى في وزارة الثقافة (سي محمد ب.ص) الحوار التّالي :
- القلقال/ بربّي سي محمد بحكم معرفتكم للرهانات الحاليّة للمشهد الحضري التونسي و بحكم اطلاعكم على إشكاليّات التعبير و الحداثة في العالم ما قولك في هذه التنصيبة ؟
- سي محمد/(أجهش سي محمد بالضحك...)
- القلقال/ نعاودلك السؤال سي محمد ؟
- سي محمد/ لا واضح واضح (وهو يمسح عينه من دموع الضحك)
- القلقال/ ما المضحك إذا ؟
- سي محمد/ قالب السؤال مسني في نرجسيتي و في نفس الوقت أحسست بتباين كبير بين جدّية سؤالكم و هذه المهزلة البصريّة (يشير بسبّابته إلى التنصيبة)
- القلقال/ باهي سي محمد بصيـّاغة أخرى تنجّمشي تعطينا تحليل استيتيقي مبسّـط انطلاقا من الرموز البصريّة متاع ها العمل الفنّي.
- سي محمد/ (بأكثر جديّة) شوف خويا بحكم العمل متاعي أتيحت لي الفرصة باش ندور العالم شليلة وْ مليلة... ريت وْ ما ريت... شمال جنوب... شرق وْ غرب... قبح و جمال ... وْ باش ريت شيْ شبيه بهذا الورم البصري لا لا لا
- القلقال/ موش لهذه الدرجة زادا ؟
- سي محمد/ وْ أكثر صدّقني ... بدون مبالغة بكل موضوعية و بقطع النظر على كل الاعتبارات الشخصية... نقلــّك أنّ هذا الشيء لم و لن يرتقي إلى مستوى القبح..(بعد رشفة فيلتر يشعل سي محمد سيجارة حوّاء ويقول) أمّا في ما يخص البعد الرّمزي لهذا الشيء يمكن الحديث عن 4 مكونات أساسيّة :
* المدرج .... صعودا في اتجاه العلم و نزولا في اتجاه المدينة, ثنائية معروفة و تقليدية صعود/نزول, ارتقاء/رسوب, نجـاح/فشــل.... في كل الحالات الحركة من مفهوم سلبي إلى مفهوم ايجابي ترغم المشاهد على المرور درجة درجة من مستوى إلى آخر من طبقة إلى طبقة.............. و يتواصل تحليل سي محمد بتعقيد ممل وصولا إلى * العلم إلــّي حســب رأيه "في هذا الحقل المجازي لا يمكن أن يحتمل أي بعد رمزي إلا السلطة".
- القلقال/ (حسب ما فهمنا السيّد قالّك في اللاوعي متاعو مسكون برغبة جامحة تتمثل في التدرّج نحو الصعود إلى أعلى رموز السلطة)
- سي محمد/ في نفس الوقت * الحمامات (الطيور) المكبلة ما تنجّم كان تعبّر على الحرّية المكبّلة في العلم حتى لا نقول بالعلم...
- القلقال/ و العنصر الرّابع ؟
- سي محمد/ بالنسبة للعنصر الرّابع إلــّي هو النـّافورة يمكن لأي إنسان بسيط أن يلاحظ أنه عنصر ملصق ولا علاقة له بالتركيبة الهرميّة لبقيّة التنـْصيبة.
- القلقال – معناها ؟
- سي محمد/ معناها واضح.. السيّد بعدما أكمل العمل متاعو فاق بالمحرّك الوصولي اللاواعي للرموز البصريّة المقترحة فقرر تطهير هذا الشيء النجس - و هنا أشير و أسطـّر أنّ المرجعية القيميّة لمنتج هذه التنصيبة طيـّبة على خاطر الرغبة في نقد و تطهير الذات موجودة و لكن خسارتو موش واعي - بنافورة حتى ولوْ كانت صغيرة و راكبة تركيب.........

في الحقيقة سي محمد واصل التحليل متاعو بكل دقــّة بالاعتماد على مرجعيّات خْشينة في علم النفس التحليلي و السيميوتيقى و تاريخ الفن... و لكن ألحّ علينا باش ما حطــّو حتّى حاجة من هذه المرجعيّات (قالــّك هذا الشيء ما يستحقّش)

خلاصة : وراء هذا العمل الجبّار لــ
Gaudi
متاع منزل تميم رغبة جارفة في الرّقي و الارتقاء إلى أعلى الهرم كرّهت منصف في الطيران و جعلت من مقهى منديلا كواليس لمسرحية أبطالها حمامات مكبــّلة و نافورة معطــّلة... الهادي حلـوْتو يقترح توسيم رئيس بلديّة منزل تميم قالــّك : يجب علينا أن نعلــّق في بزّولته وسام حمامْ".

منزل تميم في 24/07/2008


صدّق أو لا تصدّق--- الصور لا تكذب

نزلت الفنــّانة الاستعراضية اللـّبنانية الأصل ضيفة في سهرة خاصة و سـرّية للغاية على نزل صدربعل بمدينة الحمّامات الجنوبيّة بتاريخ 22/07/2008 الأخوين طارق و بلـْحسن الجميـّـل يعملان بإدارة هذا النزل منذ 5 سنوات دار بينهما و بين مدير أعمال الفنـّانة السيّد فريدي دي مان دردشة قصيرة و طريفة أثناء تسلمه لرموز التحويل البنكي للفلوس متاعْ شاكيرا.
وفي أثناء هذه الدردشة مازح بلـْحسن السيد فريدي بدعوته مع كامل الفريق العامل مع شاكيرا لحضور حفل زفاف خوه طارق (ما تسبقوش الأحداث) لتناول العشاء و الاستماع لموسيقى شعبيـّة تونسيــّة أصيلة – ثمّ قـدّم له استدعاء وردي فيه زوز قلوب لوز باسم شاكيرا و حرمه.
تعـدّات الحكاية بتفدليك كبير ثم خرج طارق بعــد يوم من هذه الحادثة في كونجي العرس... تعدّات الحنــّة و الوطيــّة حتّى يوم الجمعة الموافق لـ25/07/2008 على السـّاعة العاشرة و النصف ليلا رقم غريب تنقلـْنا خصّيصا لمشاهدته على شاشة الجوّال متاع بلحسن (112777777112) – بربّي ما تقلقوش الرّاجل بالأبّالات -
- ألو... شكون معايا
I am Fredy… ze Shakira’s manager.. I am in meztmim me and all ze team
- وْ شاكيرا زادا
Of course.. sûrrr
قلــّو بلــْحسن
Where are you exactelly
...نقسملكم بالله العظيم هذي حكاية صارت في البلاد وْ حتّى واحد ما عرف إلـّي شاكيرا دخلت إلى صبّاط بن قويدر كان طارق وْ بـلحسن الجميّـل و فريق القلقالْ.
... باش ما نطوّلشي عليكم دخل كامل الفريق إلى أحد الديارْ العربي في صبّاط بن قويدر بعد ما أوهـم طارق أمّو وْ خالاتو وْ أولاد الحومة أن مجموعة توريسـت تخدم معاه جاوْ يتفرّجو في العرس. و هكذا تناول كل فرد من الفريق العامل مع الفنـّانة شاكيرا- بما في ذلك خوها تونينو- بلاتو فيه لحمة بقري تميميّة حرّة و بطاطا و فلفل مقليين و مورسو طاجين و تبسي كسكسي بالعصبان فاضل من الغداء. و من بين الأحداث الطريفة (دائما على لسان بلحسن) واحد من الحرس الخاص تناول عـصبانة (طويلة المدى) كاملة فرْدْ فمْ ضحّكت جميع الحاضرين بما في ذلك زملاؤو وْ أم لعروس (خالتي زهرة ربّي يفرّج علاها ) خاصـّة بعد ما تعقـْدت الفتلة متاع العصبانة على لسانو الصغير... من الطرائف أيضا أن شاكيرا جابت مغرفتها و فرشاة و معجون أسنانها معها و ما ذاقـت حتّى قشـّّة كان تفتوفة طاجين و شليخة دلاع . يقول نور الدين (شهردْجيمس) من حومة بالنـّمسْ أن تلك المرأة المجنونة التي حضرت في عرس بلحسن تحولت في رمشة عين :
"هي تحك في سنـّاها بحْذا الشيشْمة متاع وسط الدار سمعت الحسينية داخلة للزقاق جايبين لعـْروسة... قالــّك شرّكتْ روبتها حتى فوق الركبة (تي قالــّك حتى وْراكها يتـْشافو) و خرجت تجري بالمشاف وْ جماعتها في جرّتها"/
وْ هات يا شاكيرا شطيح حتى وصّـلتْ لعروسة لـْـباب الدار من بعد رجعت هي و بلحسن تشطح و ترعّش و النـّـاس دايرين تحت و فوق الحيوط يشطحو و يصفقو و يتفرجو حتى مشاوْ عرقْ في مرقْ... و في أثناء الرقصة وشوشت شاكيرا لبلحسن فتقدم هذا الأخير إلى قائد الفرقة النحاسيـّـة و عازف الكلارينات المتميز حمـّادي الجميّل وأخذ رقم الهاتف الخاص متاعو و سلـّمه إلى شاكيرا بعد كتابته على علبة كبريت... و يقول طارق( لعـروس) أن شاكيرا خبأت العلبة في مكان حسـّـاس للغاية فخدشت بذلك حياء الحاضرين.
اللقطة الوحيدة المتخلفة هي مناوشة إشاراتـيـّة دارت بين أحد الحرس الخصوصيين متاع شاكيرا و دْجيمسْ عندما حاول هذا الأخير إرغامها على الرّقص معه بطريقة بدائية بعض الشيء – في نفس اللحظة قفز واحد آخر من الحرس من وسط الزحمة الرّاقصة و رمى بشْـكير حمـّـام أزرق مْخطـّطـْ على أكتاف الفنـّانة ثمّ خرجو من الزقاق برفقة بلحسن و أصحاب العروس حتى تمّ توديعهم على مستوى الكيـّـاس الجديد.
يقول بلحسن ما فهمتشْ كيفاشْ غدرتني الدموع لحظة إلــّي شاكيرا حطـّت يدها على كتفي و قالت لي بكل حنان :
It is a really happy hour for me and for all ze team
و مسـْحتـْلي دموعي بطرف البشكير
كذلك فريدي ظهر في مستوى عالي برشة وْ قالــّي :
sink you..sink you…sink you
وْ رجعو طارو بسيّاراتهم الفخمة في اتجاه مدينة الحمـّـامات... بلحسن ما هوّاش كذاب و العديد شاهدو وحدة توريست مهبولة تشطح عالحسينية في عرس خوه و لكن قالنــّـا بفمـّو عرفت أن حكايتي لا و لنْ تصدق لحظة رجوعي للدّار (بعد ما شيـّـعت الجماعة) حيث عيطتلي زهرة (أمـّي) متنرفزة و تفبري
تراه طلــّعو علاش ؟
قالت لي الشهر هاظا (مع تضخيم ال هـ) شريط (مع تضخيم ال ش- اشتريت بالتميمي) 6 بشاكرحمــّـام سلــّيتوهم بالواحد بالواحد ...هزّتلي لبـْشيكرْ هاك المسْـبوعة متاعك.. أوشي؟
عندو حق بلحسن الحكاية لا تصدق و لكن شفت الصور وقاعدين إنـّسقو في العمليّة مع لوخيّان في صبّاط بن قويدر باش ننشرو على هذه المدوّنة الصور لتأكيد الحدث و من ناحية أخرى لوكان سمعتو هذه الواقعة من أي مصدر آخر تفكروا أنّو القلقال قالها و سمع باها قبل ما يقولها حتى واحد...

منزل تميم في 26/07/2008

مركز المراقبة الفنيّة للعربات الخفيفة بمنزل تميم :
شعارنا عالسـّــرْ و الكمّونْ ... وحـْـدو وحـْــدو

(شفـْت بعيني محدّش آلـّي) كنت عايز أكتب الكلام ده بالمصري بسْ ما ادرتشْ مشْ عارفة لي... لا يمكن لأي حريف أو زائر لهذا المركز أن يتخيل أنّو فمّا مشاكل رشوة أو تخلــّف بيروقراطي و لا حتّى تكنولوجي... بالعكس في الظّاهر كلــّو تمام... شيْ يعمل الكيف.
هزّينا السيّارة و تنقــّـلنا (أنا وْ مواطن خبيث من نوْعو) في اتجاه الفازيتا متاع منزل تميم/ الأمور الكل مرّت على أحسن وجه (السيّارة المعنيّة بالأمر عمرها 3 سنوات) كلــّو في الــ
Bien
آخر عمليّة معاينة هيّ الإضاءة و المرآة, الإضاءة لا باس لكن البلـّور الخلفي للسيـّارة فيه مشكل (تكسيره صغيرة 3/2صم)
طاحت السيّارة في الفازيتا
- يا والله مصيبة, آشْ نعمل يا وخيّا.. توْ هاذي حكاية اطيحوني علاها ؟
- قانون أختي
- آشْ نوّ الحل
- شوف كيفاش تحكي مع الشّاف...
يدّو...فاها الحل و الرّبط
-هكــّة ؟
-هكــّة
مشينا للشّاف, بعد العديد من المحاولات المتنوعة خرج معنا من جحــْــره المكيّف لمعاينة العربة معاينة استثنائية مع التّركيز على النفخان... و الهزّان و النفضان... بالمـْحاولة قال الشـّاف :
- جيبو فاتورة تقول إلــّي لحمتو البلـّــور وارجع حالا خوذ وراقك.
- عيّش خويا الغالي
- إزْربو رواحكم نـْسـكـْـرو ماضي ساعة.
زْربنا رواحنا صلـّحنا وْ لحمنا وْ خذينا فاتورة وْ رجعنا قبل ربع ساعة إلى الشّاف لقيناه روّح... قالو مزروب...
- أرجع غدوة
- عادي ؟
- عادي
رجعنا غدوة طلع معانا كالعادة لمعاينة البلــّور الخلفي للسيّارة, ما فمّا حتى أثر ظاهر للعيّان و لكن جاوبنا بكل محقرانيّة :...
- لا (مع التركيز على إشارة "برّة روّح" بطرف السبّابة)
- عيّش وليدي يهديك تشوف في حاجة ؟
- البلــّور الخلفي لا يزال هشـّـا يمكن أن يتسبب في حادث
- لا شبيه لوز هو؟ كيفاش هشْ ؟
- أيّا عيّش أختي خلّيني نخدم على روحي
- يا وليدي جيتك من جناب الله عدّيني توّة نشوف في 404 باشي البـلــّـور الأمامي متاعو مفرشخ تفرشيخ وْ هو خارج يدّرجح مْـلصــّقْ الفازيتا... تي علاش هكـّــة؟ حاقرني ؟
- من فضلكم غادرو حالا وإلا نعيّـطلكم للأمن
خرجنا من مركز المراقبة الفنيّة مظلومين مقهورين على حكاية فارغة...
بالوقت قادني المواطن الخبيث إلى صديق قليبي (مستشار شعبي) متخصص في هذا النوع من المظالم و هذا ما قاله بالحرف الواحد بعد ما حكينالو غريبتنا :
- أيّا عمّي (يحكي للمواطن الخبيث) ... صاحبك كاري دارْ بحْـذانا في قليبية و هي في الحقيقة هديـّـة من عند الأحباب لمدة 10 أيّام... إمشيو جيبو كرضونة بيرّة ما دامْ عملت تليفون ........ (كان الأمر كذلك)
...
أيّا خويا ترجع غدوة تقوم بنفس العمليّة و تقول له " بعثني فلان الفلاني " توْ يقلّك " شنيّة أمورو ؟ " تجاوب "كذا و كذا"
...
تمّت العمليّة كي الزّيت عالماء وْ صاحبنا طلع الباتش متاعو ساهل برشة..
اقتراحنا كـتـْميميّة هو التّالي :
يا ريت الإدارة المشغلة لهذا النوع من الموظفين تقوم بعمليات جراحية تتمثل في زرع
Un port USB, Série ou bien parallèle
في أي مكان شاغر في أجسادهم لتسهيل عمليّة الباتش متاعهم و بالتّالي العمليّات الإدارية التابعة لنشاطهم و يا حبذا لو ممكن موقع على الأنترنات حتى يتسنّى لبقيّة المواطنين استعمال و تحميل كلمات السر متاعهم... بحيث الواحد قبل ما يهز أمّو للصبيطار وإلا نسيبو للبلديّة يقوم بعملية تحميل كلمات السر والكمّون متاع الشّاوش و الممرض...
علاش لا...
تخصص الإدارات ربع ساعة من كل يوم للباتش متاع الموظف..
(منظر فيهم و الجماعة ممدودين على كروشهم.. اش بيهم.. نباتشيو فيهم)
علاش لا...
ما تحكيش مع المضفين المتقاعسين... ديراكت دوبا تورّيه
La clé USB
متاعك يعرّي البور متاعو و يشرجي
Les pass
وحدو وحدو
هذا حسب راينا مشروع إلكتروني واعد خاص بالإدارات المتقاعسة...
زعمة اش نسمّيو الموقع الالكتروني ؟

الاثنين، يوليو 14، 2008

منزل تميم في 02/07/2008

مع ماضي ساعة متاع النهار لـحْمــــــت عـركــة حامـية الطـّـطيس في وسط السوق قــدّام صابر الحمّاصْ..
السبب : لطفي الديمارير يقوم بعمليّة تهجّمية على أحد التاكسيستيّة إليّ زمّر عليه ( كلنا نعرفو إلي الديمارير ما يحبّش التّزمير في القايلة) و لكن ما عـليناش و لله في خلقه شؤون... التاكسيست أصيل مدينة سيدي جمال الدين, فوق التزمير ينزل من سيّارتو و يْشلبقْ الديمارير بكـفْ من الصّنف الثــّـالث على خاطــر ســبْ الجلالة و زاد قال كلام بذيـــــــــــــــــــــــــــئ (ربي يهديه... كلنا نعرفو إلـّي التاكسيستية ما يحبوش سبّان الجلالة في القايلـــة) إلــّي زاد في الطين بلاّن وْ عطـّـل حركة الجولان هو تعاطــف أحــد المترجّلين (عـْـلاه الحُـقرة) مع الديمارير إلــّي تصْعـب السيّطرة عليه في مثل هذه المــواقف
ها التعاطف خــلىّ التاكسيست يقوم بعمليّة طريفة من نوعها على مرأى و مسْمع متساكنين قهوة منديلا : السيد ياخو البورطابل متاعو يطلب ال1200 فيعطيوه رقم مستشفى الرّازي بمنوبة... و بالفعــل رغم محاولات المتساكنين يِِِعْــلم الجْماعة على حالة لطفي الديمارير.. و لكن الحمد لله بفضل وعي وْ تطوّر الفكر القوّادي عــند التـــميمية تمّ الإتـّفاق بعـد أخذ رقم التاكسي المعـنية بالأمرْ على إعلام نفـــس المستشفى (من طرف 3 وإلاّ هـوما 4 مواطنين) على حالة التاكسيست لِمْســرْمِـنْ
أمّا الديمارير فـقد تـمّـــت السيطرة عليه بحارة كريستال وْ بيبـــرو كـُــولْ ْمِـنْ هاك النّوع المتوسط.... و ما روّح مالسوق كان ما زاد ضْرب النـّـصري في 150 فرنــك


منزل تميم في 04/07/2008


ولْدْ بو شاربْ البراوطي شْـرى نهار السّــوق فِـنْــشْ (بغـْـل قصير) أحمر ولد 3 شهور عـرفنا مؤخرا إلـّــي أصول ها الفِـنْــشْ الصنديد ترجع لمنطقة الهوّارية الجنوبية واُحتفالا بفِـنْــشْ الرّوج (ولد بو شارب) تلمّو البراوْطيّــة متاع البلاد و مشاوْلو قــدّام دارهم الكائنة بحومة الغرفة بعد اقتناء مستلزمات الإحتفال يقول أحد العملة بمونوبري منزل تميم أن مستلزمات الإحتفال (من عصير و ڨازوزْ و مناديل ورقية و شفراة حلاقة و بطراة و سكاكين) فاقت بكثير سوم الفِـنْــشْ (ما عْـليناش اللّهم لا حسدْ). يقول عبد السلام أحد الجيران أنه نضرا لأهمّــية الحدثْ تمّ اللّجوء إلى خدمات مزاودي من مزاوديّة الحومة مع زوزْ وَزّانــة متخرّجـــين مؤخرا من السجن المدني بالهْواربْ باشْ ما نْطوّلـْـشــي عـليكم, بشهادة عـضو فيديرالي في نقابة البراوطية, أنّ عــمليّة شواء و أكل الفِـنْــشْ ما دامتش أكثر من ساعة... و دائـــما على لسان نفس المتحــدث (على فكرة هو بكّــوش لكن فسّــرْلي الحكاية بالإشارات)... يقول أنّــو بعـْـد شرب العصير و الڨازوز الـجماعة جاعــــو و بـْــداو يخمّـمو في أكل واحد من المجموعة الموسيقيّة... و لكن هيْ هيْ هيْ هيْهات هــذا الأخير غافِـلْ الكـلْ و تــــبوّل في المـسـجّــلة حتى لا يتمكّن البــراوطية مـن الإستغناء على أعضاء الفـرقة لذلك تــمّ اللّـجوء إلى أعْــضاء الفِــنْـشْ الصّغير
نزيدكم زيادة...
المزاودي المعـني بالأمرْ (كواكبْ) يشوف إلِّي شكوة الماعز صغيرة على إمكانياته الرئوية لذلك شجّع المجموعة على ذبْح الفنْش الصغير بعــد ما وعدوه يخلّيولو الجلد صحيح ويقول أحد الموضفين ببلدية منزل تميم أن العازف المنحرف قدم إلى مقر البلدية صباح الخميس من نفس الجمعة برفقة الفنان الشّعـبي محسن المؤدب بهدف تسجيل براءة الإختراع متاعو ...
المـــــزْود الفنّــاشــي أو الفنْ آشـــي ؟ (إنت والدّيسْبونيبيلتي)
آلة نفخ شعبية خاصة بالمهرجانات الكبرى ( نقولو أحنا كرتاج وإلاّ الفحصْ مثلا )
خلاصة القول لمْ يتمكّن هــــذا الأخير من تسجيل اختراعه لسببين اثنين ( القانون قانون )أوّلا لعدم امتلاكه لأي إثبات هوية ( لا عندو ب.ت.و لا عندو باسبور ) و ثانيّا لكوْنه تقدّم بِطــلبه هــــــذا تحت تأثير البوڨا ( أطـــلب اللّطـــفْ )

منزل تميم في 06/07/2008


بنّانة ولد فسّــو طهّـــر ولـــدو نهــارْ الجمْعـــة إلّي فاتت في قاعة تميم للأفراح...
الحدث كبير اهْــتزتْلو أحـزمة المدينة, الدخـول للقاعة بالبونو... موشْ تْفـــدْليك شــدْ روحك عزيزي القارئ أحيا السهرة الفنّان اللامع بالعـرق سميــــر لــوصيف, آه مْمْلة... سمير لوصيف غـنى و تفنّن في الغـناء على تـفـْـشة ولْد بنّانة و تمايلت الجماهير بكل غـبْطة وسرور و استغراب وهي تستمع لسمير بعــد يا مّميمتي الغالية يتمايل على الركْح مع لا توجعْــلي وليْدي و لا نغـضبْ عليك . بالطـّـبيعة حضر الحفل ثلة من المثقفين و من أعيان البلاد الواعين بالدور الاجتماعي و الاقتصادي لبنّانة و أخواته, واحد رْشـقْ لفـّـة بو تلاثين تشـوّك اللّحم و واحد آخر ظاهر عْـــليه من مخلفات صفحات خضراء بدى صفحة جديدة من خلال قيّامه برقصة الصّـــك البنكي, بلغة أخرى رشق شاكْ يذبح.. و هات من هاك اللاّوي... الحاسيلو تعــدّات ليلة رائعة في الحقيقة بلاش مشاكل و حتى من سمير إلّي كما عاهدناه ما زال مؤمن بدوره في التنمية الريفية, كان في مستوى الأحداث موش متاعْ ڨمّـرت و لكن هالمرّة متاع مزْ تميمْ ... عْـملْ جــوْ باهي و فرحـو بيه فوق الحساب.
إنْشالّهْ عــادْ ما يطلعـش في قناة حنّبعل كــــي العادة و يقول ضربوني بكانون شاعل في مدينة الدخلة.

تكْ ذيــبْ
الأولاد في الحومة تنرفزو ياســر بعد هاك التصّريح العـشوائي لسمير لوصيف ...
تي شي يْقـلـّـك الزّڨـْـننّو خرج من الاعتصام الذي قام بـه جمْعـتْها في تْوالات المـرْشي و يحلف باش يتْكتف أنّه كان من المدعوين و قال إلّي ما فمّاش منْها حكاية الكانون... اللّهم على خاطر وقت إلي ما حبــّش يغـنّي فــْـطيمة الجرْمانة عـمْلتلو رقصة الكانون باش تْسـجْعـو فمّاشي ما إطــْـير الحشمة و يسْتقـْلمْ مع الجّـــّـّوْوْوْ... الحاصـل ما فْهمناش آش نوة إلّي ما عجبش سمير, ابحث معنا
هل هي الضّربة في حدّ ذاتها ؟
أمْ هي الضّربة بكانون ؟أمْ يا ترى لعــلّ الضّربة بكانون شاعل هي إلي قلقتو في الدّاخليّة مْــتاعـو ؟


خبرعاجل 007

سفيان وِلْـدْ الرّحلي (شهـر سوسو) شرى فسْبا بيجو بمليون و سبعة آلاف, طرافة الخبر ليست في الفسبا ولا في المليون و إنما في السبعة آلاف... المرة الجاية نحكيلكم حتى يأكّـدلي الخبر مراسلنا في زقاق الوﭭاعة

خبرعاجل 006

قهوة بونني تحتضن عام 2009 بطولة منزل تميم في شيشة الطاولة

خبرعاجل 005


جمعـيّــة النعْــــــناعْ الأخضــْربالــــــدّاموسْ تناشــد الهادي حَـلوْتو للتّرشح لجائزة القهْواجي المثالي لعــام 2008





خبرعاجل 004

مودو يطالب بحق الرّد على الإشاعات المغرضة التي نشرت على المجلة الحائطية لحمّامْ بن صالحة

خبرعاجل 003

وسيمة تلتحق بقناة الموزاييك

خبرعاجل 002

طريفة تساهم في ورشة كتابة المجموعة الكاملة لبيوغْرافيا مْــني الدّرْباكة

خبرعاجل 001

عـنـتـــتر الطبّــالْ يُـرْغـم على تقديم استقالته من ودادية الفن البدوي بعد أن تمـّت دعوته لمهام أخرى

خبرعاجل 001

عـنـتـــتر الطبّــالْ يُـرْغـم على تقديم استقالته من ودادية الفن البدوي بعد أن تمـّت دعوته لمهام أخرى

كليكي كان تحب تشوف من قريب

شيلة بيلة

الزّبـلة و الخرّوبة


- الإستيتيقا التجريبيّة لبلديّة منزل تميم تتواصل مـتجاهلة التّكاليف الباهضة لهذه الفلسفة
- المواطـن صالح م. يقول أن قرارات رئيس البلديّة تتْبع حركة و تنقـل الأقـلية أيْ الطبقة المترفـّهة

(الأغنياء قال المواطـن) و تتجاهل مسْتلزمات الأغـلبية الفقيرة.
- و يقول أيضا أنّ رئيس البلديّة يتعـمـّد تجاهـل المحاور الإقتصادية للمدينة.
- نفس المواطـن يقول أن بلدية منزل تميم بصـدد عزل الأزقـّة و الأنهج الضيّقة عن المشهد العام... الإرادة موجودة هذا أمـر مفروغ منه لكنّ فلسـفة التصـرّف في الموارد تخدم مصالح أفراد و ليس في مصلحة المجموعة.
- النّاس غارقة في الزبلة و الحجر في الشمردل و الواتية و البيّاضة و السيـّد يزيـّن في طريق البحر و يعـملْ في الجّـردْ و الرّمبواناتْ...

آش عندك ما تقول ؟